திரை தேவதைகள்
Rs.250.00
இந்தியா மட்டுமின்றி உலகின் பல நாடுகளிலுமே பெண்களை முதன்மைக் கதாபாத்திரங்களாகக் கொண்ட திரைப்படங்களின் வரத்து எப்போதுமே குறைவுதான். எனினும், ஓடிடி தளங்களில் நமக்குக் காணக் கிடைக்கிற தரமான படைப்புகளில் வரும் பெண் கதாபாத்திரங்கள் பலவும் நம்மையும், நம்மைச் சுற்றியுள்ள பெண்களையும் நினைவுகூர வைப்பதைத் தவறுவதில்லை. இதைத்தான் ‘திரை தேவதைகள்’ நமக்கு முதலில் உணர்த்துகிறது.
தமிழ், மலையாளம், தெலுங்கு, கன்னடம், இந்தி, பெங்காலி, மராத்தி மட்டுமின்றி, வெளிநாட்டு மொழிகளிலும் 2020-க்குப் பின் வெளிவந்து, ஓடிடி தளங்களில் காணக் கிடைக்கின்ற பெண் கதாபாத்திரங்களுக்கு முக்கியத்துவம் அளிக்கும் 25 படைப்புகளை எளிய நடையில் அலசுகிறது இந்தப் புத்தகம்.
அன்பின் வெளிப்பாடுகள், அதிகாரத்தில் பக்குவம், சுயம் இழக்காத தாய்மையின் மகத்துவம், பெண்ணியப் பார்வை, உறவுகளைக் கையாளும் விதம், ஆணாதிக்கத்தை அணுகும் வழிகள், பிரச்சினைகளை எதிர்கொள்ளும் துணிவு, சமூகத்தை மாற்றும் உத்திகள் எனப் போகிற போக்கில் பல வாழ்வியல் கூறுகளை கதைக்களம், கதாபாத்திரங்கள் மூலம் தெளிவானப் புரிதலை ஒவ்வோர் அத்தியாயத்திலும் பெறலாம்.
திரைக் கதாபாத்திரங்களில் நம்மைக் கண்டடைவது எப்போதாவது நிகழும். ஆனால், இந்தப் புத்தகத்தில் இடம்பெற்றுள்ள 25 திரைப்படங்களின் கதாபாத்திரங்கள் பலவற்றிலும் உங்களைக் கண்டடைவதற்கான சாத்தியம் அதிகம். இந்தப் படங்களில் வரும் பெண்களில் நீங்களும் ஒருவராக இருக்கலாம். அல்லது, அந்தப் பெண்கள் சந்திக்கும் ஆண்களில் நீங்களும் ஒருவராக இருக்கலாம்.
ஆம், இங்கே விவரிக்கப்பட்டுள்ள பெண் கதாபாத்திரங்களில் தன்மைகளில் பெண்கள் பலரும் பொருந்திப்போகும் அதேவேளையில், அவர்களைப் போன்ற பெண்கள் தங்கள் வாழ்க்கையில் ஓர் அங்கமாக இருப்பதை ஆண்கள் உணரும் அனுபவமும் கிட்டும். இந்தத் திரை தேவதைகளுடன் நிஜத்தில் நாம் தினம் தினம் சந்திக்கும் தேவதைகளை ஒப்பிட்டு, நமக்குள் ஓர் உளவியல் விழிப்புணர்வு தூண்டப்படுவதை ஒவ்வோர் அத்தியாயத்திலும் உணர முடியும்.
Choose Quantity